25 April 2012

MAU HPA AWNG DANG LAM HTE CHELSEA

  
  Dai ning na English Premier League hta No 6 madang de du hkra hkrat mat ai Chelsae gaw n'myit mada ai sha, ladat sara (Coach) n'nan rai nga ai Roberto Di Matteo (caretaker) a lakhtak hta alak mi kaja wa n'na, mungkan gawdin pinra hta e mying kaba dik rai nga ai Barcelona hpe mau hpa awng dang lam hte 2012 ning aq Champions League Final de lahkam lung mat sai hku re..

 Guardiola aq Barcelona gaw Valdes; Puyol, Mascherano, Pique; Cuenca, Busquets, Xavi, Iniesta; Sanchez, Messi, Fabregas ni hte 3-4-3 ladat hku n'na pru sa wa let tinang madu nta shingjawng wang hta awng dan lam lu hkra hkyen lajang sa wa ai hku re.

Chelsea chyawm gaw Cech; Ivanovic, Cahill, Terry, Cole; Mata, Meireles, Mikel, Lampard, Ramires; Drogba ni hte 4-5-1 ladat hku pru sa wa n'na, madung goal n'jawq ra hkra sha hpang lam shagreng n'htawm shing jawng mat ai hpe mu mada lu ai.

Shingjawng poi hpang ai hte nan Barcelona gaw lawan ladan hte Chelsea aq Goal jarit makau hkan hkrai gayin gaye rai, lu ai ahkaw ahkang ni hpe ntat kau ai sha ten tup, Goal lu na matu shakut shaja let woi ningshawng ginsup nga ai, chelsea gaw dang da ai Goal 1 hpe n'sum mat hkra makawp maga let maidang pyi masawp nrau na daram Barcelona ni aq htawng bang ai gawdin ni hpe nrau nhtau rai shakut makawp maga ra nga ai hku re, raitim ginsup ladat tsawm ai Barcelona gaw gawdin hpe 80% ram du hkra lu lang ginsup mat n'na langai hte langai matut mahkai ai lam hta chye na let minute 35 hta gaw Busquets hku n'na Barcelona ni aq matu kabu hpa goal Langai hpe lu htawng bang dat nu ai..

Myit rawt mat ai Barcelona ni gaw ginsup n'gun hpe kahtap shatsaw nhtawm goal bai matut lu na matu htim gasat ladat hpe lang mat n'na minute 43 hta gaw law la ai Chelsea masha ni aq lapran Barcelona aq matu Lahkawng ngu na goal hpe Iniesta kawn htawng bang dat sai hku re, goal lahkawng jaw kau ra sai Chelsea gaw goal lu na matu langkan nga ai ten ningbaw rai nga ai John Terry gaw mara kata manang wa aq dangbau htawng dat ya ai majaw Red Card hte le mat ra nu ai.

Shingrai masha langai yawm mat ai Chelsea hpe dang hkra nga shawng lam de hkrai ma nga ai Barcelona ni aq mara gaw n'myit mada Lampard hku n'na grai tsawm hkra jahkrat jaw dat ai gawdin hpe Ramires gaw Barcelona masha lahkawng hpe laikau da let Chelsea ni aq matu manu dan dik ai goal langai mi hpe minute 45+1 hta goal hkap ai wa aq ntsa hku tsawm dik hkra lu htawng bang kau dat nu ai.

Second half hpang ai hte nan Barcelona gaw aging agang htim gasat n'na ndang dang hkra ngu ai ladat hte u hpung ting lung n'na goal bai matut lu hkra marai shaw sa wa ai hku re, raitimung mau hpa chelsea ni aq ninghkap ladat gaw, reng dik ai Barcelona ni aq htim gasat ladat hpe aten na na makawp maga ninghkap lu nga ai , masa ntsawm wa ai Barcelona mung masha n'nan ni bai galai n'na ladat bai galai let matut htim gasat mat wa ai re.

Aten na na htim gasat ladat hte shawng de hkrai masha sumpum mat ai Barcelona ni aq mara hpe ahkaw ahkang la let, Drogba hte masha galai n'na shang wa ai Torres gaw 2012 ning aq Champions League final de lu lung mat na goal hpe Chelsea ni aq matu minute 90+1 hta htawng bang ya ai hte poi lamang hpe hpundim kau dat nu ai..



No comments:

Post a Comment